Söhbət David Borisoviçin ailəsinin yaşadığı və ailənin özlərinə məxsus olduğunu bildirdiyi mənzildən gedir.
Ailənin iddiasına görə, Ruslan Sporinyov və Natalya Çebotaryova həmin mənzilə sahib çıxmaq, ailəni evdən uzaqlaşdırmaq və mənzili öz nəzarətlərinə keçirmək istəyiblər. İddialara görə, 9 fevral 2024-cü ildə onlar mənzilə zorla daxil olaraq ailəni, o cümlədən azyaşlı uşağı evdən çıxarıblar və Ruslan Sporinyov sonradan mənzildə qalmağa davam edib.
David Borisoviç bununla bağlı məhkəməyə müraciət edib və ailənin məlumatına görə, mənzilin boşaldılması barədə onların xeyrinə qərar qəbul olunub. Lakin ailə həmin qərardan sonra da öz evinə qayıda bilmədiyini bildirir.
Bu, adi mənzil mübahisəsi deyil.
Belə ki, bir ailə öz evindən zorla çıxarıldığını, iki azyaşlı uşağı ilə birlikdə illərdir psixoloji təzyiq altında yaşadığını dediyi halda, məhkəmə belə mənzilin boşaldılması ilə bağlı qərar qazandığını bildirdiyi halda ev sahibi Borisoviç və ailəsinin evi sözün əsl mənasında hələ də işğal altındadır.
Öz halalca evindən qaçqın və köçkün düşən David Borisoviç məsələ ilə bağlı müraciət etmədiyi instansiya qalmayıb. Evlərini işğaldan xilas edə bilmirlər ki bilmirlər...
İstintaq prosesi isə insanın bütün ümüdlərini puç edir. Təzyiq, hədə, pul tələbi, sənəddə saxta imza və mövcud sübutların nəzərə alınmaması barədə iddialar səsləndirilir. Beləliklə, məsələ təkcə bir mənzilin kimə məxsus olması mübahisəsindən çıxaraq, məhkəmə qərarının icrası, hüquqların qorunması və istintaq prosesində sübutlara necə yanaşıldığı sualını da ortaya qoyur....
Bir ev, bir ailə və iki ildən çoxdur bitməyən hüquqi savaş...
Hadisə 9 fevral 2024-cü ildə başlayıb.
Məhkəmə qərarına məhəl qoymayan və evə zor tətbiq edərək daxil olan şəxslər hələ də həmin mənzildə qalmağa davam edir. Bu özbaşınalığa isə hələ də aidiyyəti qurumların göz yumduğu bildirilir. Azyaşlı uşaqları ilə birlikdə öz evindən didərgin düşən ailənin hüquqları isə birmənalı şəkildə tapdanır.
Qapı Laqunda ilə Kəsildi, Ailə Uşaqları ilə Evdən Çıxarıldı
Ailənin sözlərinə görə, hadisənin ən ağır mərhələsi 9 fevral 2024-cü ildə başlayıb. Həmin gün Ruslan Sporinyov və Natalya Çebotaryovanın mənzilə zorla daxil olduğu, qapının laqunda ilə kəsildiyi və David Borisoviçin ailəsinin, o cümlədən 3 yaşlı uşağın evdən çıxarıldığı iddia olunur. Ailə həmin gündən etibarən öz mənzilinə buraxılmadığını bildirir.
Onların sözlərinə görə, Ruslan Sporinyov isə mənzildə qalmağa davam edib. Ailə həmçinin sonrakı dövrdə təhdid və psixoloji təzyiqlərlə üzləşdiklərini, hətta bıçaqla hədələndiklərini iddia edir.
Məhkəmə Qərar verdi, Amma Ailə Evinə Qayıda Bilmədi...
Mənzildən çıxarıldıqlarını bildirən ailə hüquqi mübarizəyə başlayıb. David Borisoviç Ruslan Sporinyovun mənzildən çıxarılması üçün məhkəməyə müraciət edib. Ailənin təqdim etdiyi məlumata görə, 19 iyun 2025-ci ildə məhkəmədə onların xeyrinə qərar qəbul olunub. Lakin məhkəmə qərarının olmasına baxmayaraq, mənzil məsələsi həllini tapmayıb və onlar hələ də öz evlərinə qayıda bilməyiblər.
Beləliklə, əsas sual ortaya çıxır: əgər məhkəmə mənzilin boşaldılması barədə qərar veribsə, bu qərar niyə icra olunmayıb? Məhz bundan sonra mübahisə daha da böyüyüb və tərəflər arasında məhkəmə zalında baş verdiyi bildirilən qarşıdurma, video görüntüləri və istintaqla bağlı yeni iddialar gündəmə gəlib.
Məhkəmə zalında tək qaldı: Video Görüntüləri nə deyir?
19 iyun 2025-ci ildə məhkəmə zalında baş verənlər ailənin iki ildir davam edən mübarizəsinə daha bir ağır epizod əlavə edib.
Belə ki, ailənin təqdim etdiyi görüntülərdə David Borisoviçin əvvəlcə Natalya Çebotaryovanın fiziki müdaxiləsinə məruz qaldığı, daha sonra Ruslan Sporinyovun da qarşıdurmaya qoşularaq ona zərbələr endirdiyi görünür. Görüntülərin davamında Ruslanın Davidin boyun nahiyəsindən tutduğu da əks olunur.
Ailənin sözlərinə görə, David həmin an iki nəfərin qarşısında özünü qorumağa çalışıb və qarşıdurmadan qaçmaq istəyib. Onları ən çox düşündürən isə hadisədən sonra baş verənlərdir.
Ailə deyir ki, bütün bu görüntülər mövcud olduğu halda Davidin zərərçəkən tərəf kimi hüquqlarının tam müdafiə olunmadığını hiss edir. İki azyaşlı uşağı ilə birlikdə illərdir evindən uzaqda yaşayan ailə üçün bu artıq sadəcə məhkəmə işi deyil.
Onların sözlərinə görə, söhbət “haqqımız nə vaxt tanınacaq?” sualından gedir.
“Evi Ruslana və Natalyaya Keçirin” — İstintaqda Təzyiq İddiası
Ailənin sözlərinə görə, məhkəmə zalındakı qarşıdurmadan sonra təzyiqin ünvanı bu dəfə istintaq olub. Nizami rayon baş müstəntiqi Cəmşid Sadıqov tərəfindən David Borisoviç və həyat yoldaşının “ifadə vermək” adı ilə çağırıldığı bildirilir.
Ailə iddia edir ki, görüş zamanı onlardan mənzili Ruslan Sporinyov və Natalya Çebotaryovaya keçirmələri tələb olunub. Əks halda həbs ediləcəkləri, uşaqlarının isə uşaq evinə aparılacağı ilə hədələndiklərini deyirlər.
Ailənin sözlərinə görə, onlara qarşı hətta “çürüyəcəksiniz” ifadəsi işlədilib.
Ailə bütün təzyiqlərə baxmayaraq mənzili verməkdən imtina etdiklərini və bütün hadisələrin qanun çərçivəsində, mövcud video və digər sübutlar əsasında araşdırılmasını tələb etdiklərini bildirirlər.
HAKİMİN SƏYLƏRİ İLƏ AİLƏ NƏHAYƏT ÖZ EVİNƏ QAYTARDI!
Nizami Rayon Məhkəməsinin hakimi Qumru Əliyeva Yəhya qızının səyləri nəticəsində, 26 Sentyabr 2026 ci il tarixində etibarən ailənin mənzilə qaytarılması istiqamətində ciddi tədbirlər görülüb. Nəticədə evin boşaldıldığı və uzun müddətdir mənzilindən ayrı qalan ailənin nəhayət öz evinə yerləşdirildiyi bildirilir.
Lakin ailə üçün məsələ bununla bitmir...
Ailənin sözlərinə görə, Nizami Rayon Polis İdarəsinin baş müstəntiqi Cəmşid Sadıxov mənzilin Ruslan Sporinyov və Natalya Çebotaryovanın adına keçirilməsi üçün ailəyə zorakı təzyiq göstərib və məsələyə hələ də müdaxilə etməyə davam edir. Ailə həmçinin bildirir ki, iş materiallarında David Borisoviçin imzasının saxtalaşdırıldığını düşündükləri sənəd mövcuddur və bu məsələnin də araşdırılmasını tələb edir.
Bu gün ailə uzun müddətdən sonra öz evinə qayıtsa da, onların sözlərinə görə, təzyiqlər və hüquqi problemlər hələ də davam edir.
Qeyd etmək lazımdır ki, ailənin iddiasına görə, mənzili uzun müddət faktiki olaraq yaşayış üçün istifadə etməyən şəxslər evdə pul müqabilində pişik və it saxlayıblar. Yəni ailənin illərdir öz evinə qayıda bilmədiyi bir vaxtda, onların sözlərinə görə, mənzil yaşayış məkanı kimi deyil, heyvanların saxlanıldığı yer kimi istifadə olunub.
Bu detal isə ailənin yaşadığı vəziyyətin başqa bir tərəfini ortaya qoyur: öz evlərinə buraxılmayan ailə kənarda qalarkən, mənzildə it-pişik saxlanılıb.
ÜMİD YERİMİZ ÖLKƏ OMBUDSMANIDIR!
Ailənin bütün bu prosesdən sonra gözləntisi Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyevanın məsələyə diqqət yetirməsidir.
Ailə Səbinə xanımdan məsələni nəzarətə götürməsini, səsləndirdikləri ciddi iddiaların obyektiv şəkildə araşdırılmasını və hüquqlarının tam təmin olunması üçün aidiyyəti qurumların fəaliyyətinə diqqət yetirilməsini xahiş edir.
Çünki bu ailə üçün məsələ artıq yalnız bir mənzil məsələsi deyil. İki ildən artıq davam edən mübarizənin içində azyaşlı uşaqlar da var. Onların öz evlərində təhlükəsiz və rahat yaşamaq hüququnun qorunması isə bu işin ən həssas tərəfidir.
Ailə evinə qayıtdı. İndi isə ailənin gözləntisi ədalətin tam bərpa olunmasıdır.
Məhz buna görə, Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyevanın bu məsələyə diqqət yetirməsi və ailənin müraciətinin hüquqların müdafiəsi baxımından araşdırılmasına nəzarət etməsi vacib görünür.
Xüsusilə azyaşlı uşaqların da bu prosesdən təsirləndiyi nəzərə alınaraq, ailənin təhlükəsizliyi, mənzil hüququ və dövlət qurumlarına etdiyi müraciətlərə verilən reaksiyanın ayrıca qiymətləndirilməsi cəmiyyət üçün də əhəmiyyət daşıyır.
Ailə baş verən bütün proseslərə baxmayaraq ümidini itirmədiyini bildirir.
Onların sözlərinə görə, Qumru xanım Əliyeva kimi ədalətli hakimlərin və Səbinə xanım Əliyeva kimi hüquqların müdafiəsinə çalışan müvəkkillərin olduğu bir ölkədə ədalətsizliyə boyun əymək fikrində deyillər.
“Biz ədalətsizliyə boyun əyməyəcəyik. Qumru xanım kimi ədalətli hakimlərimiz, Səbinə xanım kimi hüquqların müdafiəsinə çalışan müvəkkillərimiz olduğu müddətdə haqqımızı tələb etməyə və ədalətsizliyə qarşı mübarizə aparmağa davam edəcəyik”, – deyə ailə bildirib.
Yazar: Ülkər Fərmanqızı
